 |
| (AGO. Maizal. Bañugues. 2010) |
Alcuéntroles dacuando.Güei yá naide les paña...
Y entovía me güel a pólvora
y a branu y paezme
mentira
que s’esfumaren estos 40 años (que
s’esfumaron. La vida namás cunde
cuando se nos ablaya):
Taben toes les fachaes encalaes
y fresques
y golía la carne guisando nes cocines
y en toos los corredores
la lleche recudiendo nes fardeles
de sábana.
Prestábanos -qué ilusiones más rases
y más fondes-
mirar cómo plantaben les estaques
d’ocálito
pal quioscu de la música
y el puestu la barraca;
y esperar los camiones colos fierros
del tiru y de la tómbola
y a aquelles portugueses de faldones floriaos
y pendientes de cobre
que diben a la presa de mio güelu
a llavar los cacharros y garrar agua.
Prestábanos, sí, muncho
nos prestaba
que llegaren los primos,
que llenaren la casa,
la comida el domingu, nel mediu´l
tendeyón, aquella mesa llarga...
Alcuéntrovos dacuando
y entovía’l nordés -el mesmu
que m’empuxa, el mesmu que m’avieya,
el mesmu que m’arrastra- traime cachos
d’aquellos paxarinos que vais
cantando y d´aquella mozuca
con cara de gitana.
Y entovía nos altos maizales
que m’aparten de mí, que separen
pasáu d’esta edá sin sustancia,
adiéntrense pareyes de recuerdos
d’amor;
y una verbena allumbra
ente’l mio corazón y una inmensa
distancia,
con guah.inos que compren
a los avellaneros
unes gafes de plástico, carraques,
restallones y manzanes
cubiertes de colorao y escarcha.
Varines de volador..., la vida ye
lo mesmu: enciéndese,
espovisa, revienta,
y dexa
un filu
de fumu
qu’ensiguida rescampla.
